J/IMV

ஊரோடு ஊராகி, உறவோடு உறவாகி, வாழ்வோடு வாழ்வாகி, நோயோடு போராடி நீங்காத் துயில் கொண்ட சோமு தணிகாசலம்.

எமது ஊர் சிறியதாயினும் பல பெரியோர் வாழ்ந்த, வாழ்கின்ற ஒரு பொன்னான பூமி. ஐம்பதுகளில் அறுபதுகளில் நாம் யார், எமது ஊர் எதுவென பெரிதாக வெளியே தெரியாத வேளையில் பல இளைஞர் அரச சேவையில் இணைந்து கொண்டனர். பலர் வாழ்வு தேடி வன்னிக்குப் போயினர். வாலிப மிடுக்குடன் இருந்த அவர்கள் அனைவருக்கும், நாம் உயர வேண்டும், நம்மவர் உயரவேண்டும் என்பதே தணியாத தாகமாய் இருந்தது. அதற்கு முன்னோடியாய், வழிகாட்டியாய் அப்போது செயற்பட்டவர் எமது சோம தணிதான்.அவர்களது செயற்பாடுகள் எம்மை வெளி உலகிற்கு வெளிச்சம்போட்டுக் காட்டின.
தமது செய்கையால் தம்மை அடையாளம் காட்டி நிற்போரும் காலம் வரும் போது காலமாவது இயற்கையானதே. அத்தகையோர் பட்டியலில் இன்றும் ஒருவர் இணைந்து கொண்டார்.
சோம தணிகாசலம் என எம் அனைவராலும் அறியப்பட்ட எமதூர் சோமசுந்தரம் ஆசிரியரின் மகனாக 24.3.1942ல் அவதரித்த தணிகாசலம் அவர்கள் வவுனியாவில் வாழ்ந்து வரும் கால்18.01.2018ல் தன் வாழ்க்கைப் பயணத்தை நிறைவுசெய்து அமரராகிவிட்டார்.
தனது பாடசாலைக் கல்வியை நிறைவு செய்து நில அளவைத் திணைக்களத்தில் பட வரைஞராக அரச சேவையில் இணைந்து கொண்ட அவர் தனக்காக வாழ்ந்ததை விட பிறருக்காக வாழ்ந்த காலமே அதிகமானது.
விவசாயக் கிராமமான எமதூரில் அறுபதுகளிலும் எழுபதுகளிலும் அரச சேவையில் சேர்வோர் கொழும்புக்கு சென்று அங்கு தங்கியிருப்பதற்கும் அவரது ஆலோசனைகளையும் உதவிகளையும் மறக்கமுடியாதவை. அரச அலுவலகங்களில் எவருக்கு ஏதாவது அலுவல் ஆக வேண்டியிருந்தால் அவர்களுக்கு முதலில் ஞாபகம் வருவது தணிகாசலம்தான். அவ்வாறு அனைவருக்கும் வேண்டிய உதவிகளை சலிப்பின்றி செய்துவரும் ஒருவராக அனைவராலும் விரும்பப்பட்ட ஒருவராகவே அவர் வாழ்ந்து வந்தார்.
ஒரு பட வரைஞராக இருந்ததாலோ என்னவோ அவரது முத்து முத்தான கையெழுத்தைக் கண்டு நான் அதிசயிப்பதுண்டு. நில அளவைத் திணைக்களத்தில் அவரைத் தெரியாத எவருமே இல்லை எனலாம். கீழ் மட்ட உத்தியோகத்தர் முதல் மேல் மட்ட உத்தியோகத்தர் வரை எவருடனும் நட்புடனும் அன்புடனும் பழகும் அவர் நிறையவே நண்பர்களைச் சம்பாதித்துக் கொண்டார்.
எமது வாழ்வில் எவருக்கு எப்போது என்ன நடக்கும் என்று எதுவுமே எமக்குத் தெரியாது.. தனது அரச சேவையின் ஓய்வின் பின் புத்தளத்தில் கடமையாற்றிய போது எதிர்பாராத வகையில் வீட்டில் ஏற்பட்ட ஒரு விபத்தில் சிக்கி பாரிசவாத நோய்க்கு ஆட்பட்டார். அதுவே பிற்காலத்தில் அவரை நிரந்தர நோயாளியாக்கிவிட்டது. எவருக்கும் உதவியேயன்றி எந்த தீமையும் செய்தறியாத அவருக்கு இப்படி வியாதி ஏற்பட்டது மிகவும் துரதிஸ்டமானதே.
தனது இல் வாழ்வின் அடையாளமாக நேசமிகு மனைவியையும் பாசமிகு இரு பிள்ளைகளையும் இவ்வுலகில் விட்டுச்சென்ற அவர் தான் வாழும் காலத்தில் அவர் செய்த நல்வினைகள் அவரை சொர்க்கத்தில் வாழவைக்கும்.
அவர் ஆன்மா அமைதி பெறுவதாக.
வையத்துள் வாழ்வாங்கு வாழ்பவன் வானுறையும்
தெய்வத்துள் வைக்கப்படும் – குறள்

பொன் கந்தவேல்
கனடா 19.1.2018

இ.ம.வி ப.மா.ச கனடா – கோடைகால ஒன்று கூடல் – 2018

இடைக்காடு மகா வித்தியாலய பழைய மாணவர் சங்க கனடா கிளையினர் வருடா வருடம் நடாத்துகின்ற கோடைகால ஒன்று கூடல் இம்முறையும் 2018ம் ஆண்டு வருகிற ஆடி மாதம் 22ம் திகதி ஞாயிற்றுக்கிழமை (Sunday July 22nd) அனைவரினதும் முதல் தெரிவான நீல்சன்பூங்காவில் (Nelson Park) நடைபெறுவதற்கான முன்பதிவுகள் திட்டமிட்டபடி நடைபெற்றது அனைவருக்கும் மிக்க மகிழ்ச்சி. .வெளிநாட்டிலிருந்து வருபவர்களுக்கும் மற்றும் இங்குள்ளவர்களின் வேலை மற்றும் தமது குடும்ப நிகழ்வுகளை இந்தநாளை தவிர்த்து ஒழுங்கு செய்ய வசதியாக நாம் முன்கூட்டியே அறியத்தருகின்றோம். குழந்தைகள் தொடக்கம் முதியோர் வரை விளையாட்டுக்கள், பொழுது போக்கு நிகழ்ச்சிகள் என பலநிகழ்ச்சிகள் நடைபெற இருக்கின்றன. காலையுணவின்பின் உதைபந்தாட்டத்துடன் ஆரம்பமாகி மதிய இடைவேளைநிறைவில் சிறுவர்களுக்கான ஒட்டப்போட்டிகள் நடைபெறும். அதை அடுத்து சிறுவர்களுக்கான பொழுதுபோக்கு நிகழ்ச்சிகளும் ,குடும்பத்தவர்க்கான பொழுதுபோக்கு நிகழ்ச்சிகளுடன் குறிப்பாக கயிறு இழுத்தல், விநோதஉடை,சாக்கோட்டம், மூன்றுகால் ஒட்டம், தண்ணீர்வாரி இறைத்தல் என்பனசில. மாலையில் சிற்றுண்டியுடன் தேநீரும் வீடுதிரும்புமுன் மேலும் விரும்பியவர்க்கு நெருப்பில் வேகவைத்த இறைச்சியுடன் இரவு உணவுவழங்கப்படும். அத்துடன் ஊரிலே உண்டுமகிழ்ந்த பலவிதமான உணவுவகைகளை உண்ணும் அரியசந்தர்ப்பமும் இதுவே. வெற்றியீட்டிய சிறார்களுக்கு வெற்றிகேடயங்கள் வழங்கப்பட்டு நிகழ்ச்சிகள் நிறைவுக்குவரும். இம்முறையும் எமதூர் உறவுகள் தம் குடும்பத்தாருடன் முழுமையான கோடைகால ஒன்றுகூடலை இன்புடன் அனுபவிக்க எமதுசெயற்குழு அன்புடன் அழைக்கின்றது. இந்த ஒன்றுகூடலை திறம்பட நடாத்திமுடிப்பதற்கு அனைவரின் பூரணஒத்துழைப்பையும் இன்றையசெயற்குழு வேண்டிநிற்கின்றது. வழமைபோல் காலநிலை எமக்குசாதகமாக இருக்கும் எனஎண்ணி அந்த ஒன்றுகூடலுக்கான எதிர்பார்ப்புடன் உங்கள் உதவியினை நாடிநிற்கும் இந்த ஆண்டிற்கான செயற்குழு.

நன்றி.

குறிப்பு :நிகழ்ச்சிகள் யாவும்குறித்த நேரத்தில் ஆரம்பமாகி குறித்த நேரத்திற்கு நிறைவுக்குவருவதனால் விரும்பியவர்கள் தமது நண்பர்களுடன் இருந்து அளவளாவி செல்வதற்கான சந்தர்ப்பமே அதிகம் உண்டு.

கனடா உனக்கோ அகவை 150 (1867)
எனக்கோ அகவை 50 (1967)

குதூகலமாய் பள்ளியில் படித்தோம்..
தைரியமாய் உயர் கல்வி முடித்தோம்..
எதிரி வந்ததால் ஊர் ஊராய் ஓடினோம்.
குளிர் நாடான கனடா வாழ்வு தந்தது.
இல்லற சோலையில் அமர்ந்து
மகிழ்வுடன் வாழ்ந்தோம்.
திருமதியாகி தாயாகி மகிழ்வுடன் வாழ்ந்தோம்.
அகவை ஐம்பதை அடையும் தோழர்களே!! தோழிகளே!!
குதூகலமாய் ஆடிப் பாடுவோம்!!
வாழ்க பல்லாண்டு!!!

ஆக்கம் : தங்கராஜேஸ்வரி சந்திரன் (செல்வம்.)

ஐம்பதை(50) கடந்து போகும் ஞாபகங்கள்………...

ஐந்து வயதில் ஆரம்பப்பள்ளியில்
அறிமுகமானோம் அத்தனை பேரும்
உள்ளூரில் கல்வி
அதுவே எங்கள் உலகம்
பள்ளிப் படிப்பு முடிந்ததும்
பாதைகள் மாறின
ஆயினும் வாழ்க்கைப்
பயணம் தொடர்ந்தது.
வெடியோசை
வானத்தில் வல்லூறென
இயந்திரப் பறவைகள்
வாழ்கையே போராட்டமானது.
புலம்பெயர்வு முடிவானது.
உறவு நட்பு தூரமானது.
குடும்பம் பிள்ளைகள் என்று
சுருங்கிப் போனது எம் வாழ்க்கை
பள்ளிப் பருவத்து நினைவுகள்
அவ்வப்போது வந்து போகும்
எப்போதாவது காணும் நண்பர்கள்
கடமை கடன் குடும்பநலன்
எம்மை உறங்கவிடாது
ஓடவைத்தது.
பணமே உலகமானது
இன்று அகவை ஐம்பதில்
ஒன்றாய் கூடினோம்
ஆயிரம் கனவுகள் மனதில்
இனம் புரியா உணர்வுகள்
தொடர வேண்டும்
 இந் நிகழ்வும் எம் நட்பும்
இதுவே என் விருப்பம்.

ஆக்கம் : சிவசொரூபி தங்கராஜா (செல்வி)

OSA-J-IMV

இடைக்காடு பழைய மாணவர் சங்கம் – கனடாவின் வருடாந்த நிர்வாகசபை பொதுக்கூட்டம் 3:00 P.M. மணியளவில் கனடா பெரிய சிவன் ஆலயத்தில் நடைபெற தீர்மானிக்கப்பட்டுள்ளது . அனைவரையும் கலந்து கொள்ளுமாறு அன்புடன் அழைக்கின்றோம். Date – 30/12/2017 (Saturday) Time – 3:00 P.M. Place – 1148 Bellamy Rd N, Scarborough, ON M1H 1H2.

நன்றி,

நிர்வாகக்குழு!